ഏംഗല്‍സ് എന്ന പേര് കേള്‍ക്കുമ്പോള്‍ ആദ്യം തന്നെ മനസ്സില്‍ വരുന്നത് കമ്യൂണിസ്റ്റ് താത്വികാചാര്യന്‍ ഫെഡറിക് ഏംഗല്‍സിന്റെ മുഖമാകും.
എന്നാല്‍ ഏംഗല്‍സിന്റെ വിവാഹമാണ് ഇന്ന് എന്നറിയുമ്പോള്‍ ഒന്നു ഞെട്ടും. ഇതാരാണാവോ നമ്മളറിയാത്ത ഒരു ഏംഗല്‍സ് എന്ന് സ്വയം ചോദിക്കും.
അതിരപ്പള്ളി പഞ്ചായത്തിലെ അരൂര്‍മുഴി കമ്മ്യൂണിറ്റി ഹാളില്‍ രാവിലെ 11-നാണ് ചടങ്ങ്. രക്തഹാരം പരസ്പരം ചാര്‍ത്തി ഏംഗല്‍സും ബിസ്മിതയും വിവാഹിതരാവുമ്പോള്‍ സാക്ഷികളായി ലെനിനും ഹോചിമിനും മാര്‍ക്‌സും ഉണ്ടാകും.
ഏംഗല്‍സിന്റെ അനിയനാണ് ലെനിന്‍. സുഹൃത്തുക്കളാണ് ഹോചിമിനും മാര്‍ക്‌സും. വിദേശത്ത് ജോലിചെയ്യുന്ന മാര്‍ക്‌സ് വിവാഹത്തില്‍ പങ്കെടുക്കാനായി എത്തിയതാണ്.
സി.പി.എമ്മിന്റെ അതിരപ്പിള്ളിയിലെ ആദ്യകാല പ്രവര്‍ത്തകനും മുന്‍ പഞ്ചായത്ത് പ്രസിഡന്റുമായ മുണ്ടന്മാണി ഔസേപ്പാണ് ആദ്യം തന്റെ രണ്ട് ആണ്‍മക്കള്‍ക്ക് കമ്മ്യൂണിസ്റ്റ് നേതാക്കളുടെ പേരു നല്‍കിയത്.
മൂത്തയാള്‍ മാര്‍ക്‌സ്. രണ്ടാമത്തെയാള്‍ ഹോചിമിന്‍. കമ്മ്യൂണിസ്റ്റ് പ്രവര്‍ത്തകനായിരുന്ന കറുകുറ്റിക്കാരന്‍ തോമസും ഇതേരീതി പിന്‍തുടര്‍ന്നു. അദ്ദേഹം തന്റെ മക്കള്‍ക്ക് ഏംഗല്‍സ്, ലെനിന്‍ എന്ന് പേരിട്ടു.
ഏംഗല്‍സ് സി.പി.എം. അതിരപ്പിള്ളി ലോക്കല്‍ കമ്മിറ്റിയംഗമാണ്. മറ്റുള്ളവര്‍ സി.പി.എം. പ്രവര്‍ത്തകരും. കല്യാണക്കുറിയിലുമുണ്ട് സവിശേഷത. വിവാഹത്തിന് ക്ഷണിച്ചിരിക്കുന്നത് സി.പി.എം. ലോക്കല്‍ സെക്രട്ടറി കെ.എസ്. സതീഷ് കുമാറാണ്.
മാലയെടുത്തുനല്‍കുന്നത് ചാലക്കുടി ഏരിയാ സെക്രട്ടറി കെ.എസ്. അശോകനും. ഏംഗല്‍സിന്റെ അമ്മ: ആനീസ്. അങ്കമാലി തുറവൂര്‍ വള്ളിക്കാടന്‍ സേവ്യറിന്റെയും ബിന്ദുവിന്റെയും മകളാണ് ബിസ്മിത. എന്തായാലും ഈ കമ്യൂണിസ്റ്റ് വിവാഹത്തിന് എല്ലാവിധ ആശംസകളും…
